飛機上經常都會遇到一d冇共通語言 溝通不能嘅乘客
然後大家就會好自然咁進入超級無敵大電視狀態
你扮下M巾時 我又估係眼罩咁
雖然好多時都係打和收場 繼續雞同鴨講
但係乘客見你咁努力解讀
就算輸左遊戲 都贏到友誼
不過偶爾會有一兩個乘客好抗拒使用身體語言
堅持不斷咁重覆自己嘅方言
以為好似靈格風咁 聽多幾次我就會學懂外語
仲要越講越唔耐煩 越講越焦躁
仿彿唔識你d家鄉話按照村例要被亂石掟死 暴屍荒野咁
喂大佬呢單野唔係我跟開架喎...
上帝幾千年前已經搞亂晒人類嘅語言架喇
有咩你自己搵佢啦
但係講到最不可思議嘅
就係明明有d識得兩文三語嘅乘客
唔知點解硬係要選擇一種對方聽唔明嘅語言
沐浴係溝通障礙嘅濕潤之下 沉醉係單向交流嘅酥麻當中
其實如果只係想係眾人面前套弄你虛無嘅優越感
不如直接企去第一行用你引以為傲嘅語言朗誦新詩啦
最多我開PA替你隆重介紹 用埋電筒幫你打燈喇
Search